Fascia – Cauriol 2 – 0 (goi de Zanoner e Trottner)
Lorenz Manuel, Bernard, Trottner, Deflorian Gio., Dallio (20’ s.t. Lorenz. Matteo), Debertol, Porcu, Pezzei, Dellafior, Zanoner (35’ s.t. Deflorian Giu.), Toma (1’ s.t. Kola).
Cognea esser na venta e venta la é stata, e chest l’é dassen chel che più conta. Che dapò no se posse esser massa contenc per coche la é ruèda, chest l’é n’auter descors.
I motives per venjer la partida de en domenia passèda i era desvalives e no i se fermèa demò ai trei ponc che bensegur l’é l prum obietif. Te chest campionat l Fascia no aea amò vent na partida sul ciamp de cèsa e chest l’era dalbon n resultat negatif da descancelèr. Venjer dedant a la propria jent, l’era una de la pruma condizions che l’alenador fascian aea metù dant a sie jiadores al scomenz dei nonanta menuc. Apede chest, sessaben che n derby l’é semper na endesfida particolèra, amò de più se desche sozedù chest an vegn jià da na man, per l Fascia, per se trèr fora deldut da la zona de chi che sauta jù tel campionat mender, e da l’autra, per la Cauriol, per tegnir amò empeèda chela fiégola speranza de se salvèr. En più l’era ence l met de ciapèr en clasifica la Dolomitica che aea perdù contra l Fiem.
Vedede donca coche i trei ponc i era sì emportanc ma che metan ensema dut, chesta l’era na garejèda che valea n muie di più. Emben, i goi de Zanoner e Trottner rué tel secondo temp, a fat scì che se podesse realisèr te n soul colp na lingia de robes positives. Ampò, te la pruma partida de l’aisciuda olache l Fascia pontèa via desche favorì ajache jièa contra na squadra metuda piec en clasifica, i ladins no à palesà dut l bon moscià te la ultima partides, jian piutost sot ritm e no troan soraldut tel prum temp, chela gaissa e conzentrazion che à dat l met te chisc meis de se trèr fora da na situazion senestra. Se cogn dir che la pecia calità di ghesć à fat scì che i joegn de cèsa, enceben jian mèl, no abie beleche mai risćià de ciapèr gol, ma chel che più l’é restà ti eies l’é l marudel de goi falé aldò de la desvaliva bona ocajions. Soraldut tei prumes carantacich menuc, i fascegn aessa cognù essere en vantac de dotrei goi ma soraldut Zanoner se à magnà no se sà co, n par de ocajios co l’usc vet. A blochèr la trates del Fascia, l’é stat per doi outes tel prum temp e una tel secondo, ence i remenac, ma più che desfortuna se à tratà ence enlouta de ocajions falèdes.
La seconda frazion de jech à vedù Bernard e sozi ruèr te ciamp co na convinzion maora, proan sobito a schicèr la formazion da Juan te sie mezciamp e troan pech dò l scomenz l vantac de gra a n bel passaje de Porcu per Zanoner che enstouta l se à tout dut l temp per se meter jù delvers la bala e la spenjer te usc. L gol l’é stat desche na liberazion e à didà l Fascia a jièr mingol miec e a troèr sobito dò ence l doi a nia su na trata dal cianton, olache Trottner é sutà più aut de duc petan l balon vindò la schena del portier ghest.
L dopie vantac à serà sù la endesfida coi fiamaces che proan a se spenjer inant lascèa post teis ai contrataches fascegn olache ampò se à vedù da nef la pecia concreteza di atacanc del Fascia, con Kola e Deflorian che à falà gran ocajions.
L triple scìgol del diretor de jech no à lascià gran legreza tei jiadores e tei alenadores fascegn, coscienc de na partida zompa assà. Purampò resta l resultat e dut chel che aldò l’é ruà. Che pech no l’é!
Per chel che vèrda la formazions di joegn del Fascia, i Arleves seghita a destrujer duc chi che i se troa dedant jan segures envers la venta del campionat. A zeder per 7 a 1 (goi: 2 Gabriele Riz, 1 Dennis Rasom, 1 Daniele Brunel, 1 Matteo Lorenz, 1 Julian Aleksi e 1 Giuseppe Demarinis) enstouta l’é sta la Solandra. Gran suzess ence per i Giovanissimi che à vent 12 a 0 contra l Telve (goi: 6 Massimo Lorenz, 3 Jannes Debertol, 2 Samuele Ruggiero e 1 Matteo Bernard). Per la doi squadres di Esordienc envers l’é ruà doi desfates per 3 a 1 e 3 a 0.
En ocajion de la Pèsca jia demò la pruma squadra del Fascia, lunesc ai 17 de orìl da les ot da sera ja Pardac contra la Dolomitica.