Lona Lases – Fascia 0 – 3
Cincelli, Bernard, Trottner, Deflorian Gio., Dellafior, Debertol, Porcu (40’ s.t. Dorich), Pezzei, Petrone, Toma, Deflorian Giu. (30’ s.t. Dallio)
Zacan l’é ruà ence la pruma sodesfazion per la squadra maora del Fascia Balon che, en domenia passèda sul ciamp de Lases, se à tout i trei ponc. Na venta che a veder l valor di aversaries no cognessa maraveèr, ajache chisc i é ultimes co n soul pont te unesc partides. Ampò, nesciugn à jà vent dant de scomenzèr e ogne endesfida cogn esser jièda, soraldut per l Fascia de chest an che enscin ades, aea metù ensema demò 6 resultac de parità e nia de più. Se l valor dei jiadores cembrans no podea esser n gran cruzie per mister Bernardin, la maora dificoltèdes per l Fascia, les podea vegnir da la condizion psicologica no proprio sorida e dal burt ciamp, n muie strent e piutost mol. Aboncont, jà dal scomenz se à vedù che i ladins tel cef no i aea auter che na gran convinzion de poder jir a se vadagnèr la pruma venta de la sajon. E coscì, zenza se cruzièr trop del burt ciamp e de la clasifica, à tout sobito te man l jech e à metù sot i aversaries zenza ge lascèr na soula ocajion te dut l prum temp. Da l’autra la ocajions per i bec del President Ghetta les ruèa una dò l’autra ma la trates de Toma, Deflorian, Pezzei e Debertol no les à mai trefà l’usc e coscì, se à cognù spetèr l caranteisem menut per veder l Fascia jir en vantac, de gra a na dassen bela combinazion anter Deflorian Beppe e Pezzei, con chest ultim che enstouta no à bazilà dedant l portier e à trefà l varech giust.
Tel secondo temp i ladins no i se à fat ciapèr da la tema de venjer e alincontra i à chierì l secondo gol che l’é ruà dò n chèrt de ora per merit de Bernard che dò aer scomenzà l’azion su la man dreta, à seghità a corer fin a se troèr sul secondo remenat olache “Beppe” ge à fat troèr na bala che domanèa demò de esser spenta te usc.
L dopie vantac à dat chela segureza ai joegn de Fascia che mencèa da n trat e à petà jù i parons de cèsa che i se l’à touta ence col diretor de jech finian coscì la partida con doi omegn de manco aldò de n cartelin ros e doi śai.
Sora de doi goi e doi jiadores, a entoronèr l resultat a l’ultim menut, l’é sutà fora ence l terzo gol per merit de Petrone, asvelt a tor l temp a duc su na trata dal cianton.
Enceben che no venjer con chisc aversaries fossa stat dassen senester, chesta venta la é emportanta tant per i ponc vadagné che per dèr mingol de gaissa ai fascegn per jir a se tor ence l’ultima partida, chesta domenia sul ciamp de Vich contra l Vattaro, da mesa les trei.
L fin de setemèna passà à vedù se serèr sù i campionac de la squadra mendres, co la desfata per 4a2 dei Giovanissimi ma soraldut co la bela venta dei Arlieves te la endesfida anter la pruma does, de contra a la Ravinense, per 3a2 de gra ai goi de Matteo Lorenz, Dennis Rasom e Gabriele Riz. Con chesta venta i Arlieves fenesc chesta pruma pèrt de tornoi al prum post. Desche se disc, “campions da d’invern”.