Fascia – Verla 1 – 2
Cincelli, Bernard, Trottner, Deflorian Gio., Dallio, Porcu, Dellafior, Pezzei, Petrone, Cigolla (10’s.t. Hazizi), Toma (17’s.t. Deflorian Giu.).
Dassen na burta desfata chela ruèda domenia passèda de contra al Verla sul ciamp amich de Vich. Burta soraldut per coche la se à concretisà, col Fascia jit en vantac, ciapà e passà via, dant de jir a smachèr contra remenac e stravedudes del diretor de jech.
I ladins cogn fèr condemanco de Debertol scalificà ma i recupera Trottner, Cigolla, Porcu e Dallio, enceben te na condizion piutost malsegura per i malans abui te la setemèna passèdes. Fator chest che tel cors de la partida arà n so peis.
La partida ponta via zenza n gran ritm ma dò nience diesc menuc, aldò de na trata dal cianton de Dellafior, l Fascia passa en vantac de gra a n autogol de Stonfer. “Che sie la outa bona che la bona sort la vegn da noscia pèrt?” arà de segur pissa zachei. Purampò la resposta ruarà a la fin de la partida.
L vantac dei jiadores de cèsa no muda più che trop l’ejit de la partida co la doi squadres che les se fèsc front zenza na neta soramessa de una su l’autra e zenza gran emozions enscin a la fin del prum temp.
I secondi carantacinch menuc de jech desche jà sozedù te autra partides, veit l Fascia pontèr via a na vida mingol fievola ence perché l rendiment de Cigolla, Dellafior e Porcu se sbassa un muie, palesan chela condizion malsegura che se dijea dant. L’é coscì che i cembrans rua a ciapèr l jech te man se fajan inant e troan te cinch menuc anter l chindejeisem e l vinteisem menut, l gol de la parità e chel del vantac. L prum a na vida mingol fortunèda, co na trata da dalenc ferèda da Pezzei ma ruèda coscì dreta sui piesc de l’atacant ghest che soul contra Cincelli no à falà. L secondo enveze aldò de n bel passaje de Formolo che à ampò troà la defendura ladina metuda jù mèl, conzedan coscì l post a Zanotelli per fèr ite l doi a un.
L svantac sessaben à petà l moral di joegn de Fascia sot i ciuzé che ampò i é stac bravi a no lascèr alò de jièr, alincontra à seghità, profitan ence che i aversaries, troà l vantac i se à trat endò lascian n muie de ciamp per la jièdes dei parons de cèsa. Jièdes che à portà l Fascia dassen vejin a chel che fossa stat l più che vadagnà pont del doi a doi, ma che les se à fermà n’outa sul remenat aut, la trata da vejin de Giuseppe Deflorian, e n’outa sul remenat de dreta, la trata da cet de Riccardo Dallio. Per fenir co na trata dai unesc metres più che evidenta per n fal su Manuel Bernard a l’ultim menut de la endesfida, che l diretor de jech no à conzedù, dijan ampò da galantom che l se scusea ma l’era metù mèl te ciamp e che no l’à vedù delvers chel che l’é sozedù.
Cativa sort, erores, condizion malsegura, mencianzes e dut chel che se vel, ma chel che resta l’é la desfata per doi a un contra na formazion che dalbon no aea nia più che l Fascia, e che lascia i ladins con demò doi ponc te cater partides. Bensegur l’é amò prest per vardèr a la clasifica ma jà da chesta domenia se con proèr a jontèr ponc, se l’é meso, trei. E segur no sarà sorì ajache l ciamp de Telve l’é da semper n ciamp senester. Ampò a partir da mesa les cater l Fascia ge proarà.
Zero ventes ence da la squadra mendres che à troà doi resultac de parità con Arleves e Giovanissimi (3a3 e 1a1 goi de Patrick Cincelli, Giuseppe Demarinis Daniele Brunel e Samuele Ruggiero) e na desfata coi Esordienc che à perdù 2a1 contra l Valcembra. Squadres che proarà a troèr endò la venta chest fin de setemèna. I Arleves sa Vich sabeda da les sie contra l Lavis, i Giovanissimi domenia da mesa les unesc a Ischi, i Esordienc “A” a Moena sabeda da les cater e i Esordienc “B” domenia sa Vich da mesa les unesc contra l’Oltrefersina.