Vattaro – Fascia 3 – 0
Formazion del Fascia: Lorenz, Gaspari, Deflorian Gio., Drlje, Dellafior, Porcu, Piccoli, Toma (10’ s.t. Cigolla), Pezzei (40’ s.t. Deflorian Giu), Dallio, Riz (15’ s.t. Debertol).
No se à serà sù a la vida miora l campionat de la pruma squadra del Fascia Balon che à perdù l’ultima endesfida per trei a nia contra l Vattaro. N resultat dassen burt e massa pesoch per chel che se à vedù te ciamp, ajche i ladins no à jià coscì mèl desche se podessa pissèr.
Bensegur la motivazions de la doi squadres les era dassen desvalives, coi ladins che jièa demò per mantegnir l quarto post e l Vattaro che se jièa enveze la permanenza te la categoria, aboncont l Fascia no à scomenzà la endesfida col cef en vacanza, alincontra se à sproà enscin dal prum menut per venjer la partida. La pruma ora de jech defati, la é stata ben controlèda dai ladins che é stac ence chi che é jic più apede al gol co na trata da cet de Dellafior che la se à blocà sul remenat aut.
L’éjit de la partita l’é mudà al sessanteisem menut canche doi erores un dò l’auter, dant de Lorenz e sobito dò de Gaspari, à dat l met a Fontanari de troèr l vantac co na trata dai trentacinch metres che la se à ficià te l’usc fascian lascià vet.
L svantac sessaben à dat gaissa ai parons de cèsa ma l Fascia no à molà proan a spenjer amò de più e metan ensema trei cater ocajions per arjonjer la parità. Purampò i joegn ladins no à troà la giusta locia e su n contratach a diesc menuc da la fin l Vattaro à troà l secondo gol su trata dai undesc metres che à de fat serà sù la endesfida. A cinch da la fin, amò aldò n eror de la defendura ladina, l’é ruà dapò l terzo gol che à dat n ton mingol massa negatif a na partida no coscita burta.
Ampò, tout fora l resultat de chesta ultima partida, se pel segur rejonèr de n campionat più che positif da man del Fascia, co na pruma pèrt ezelenta e na seconda normala. L’obietif del scomenz no l’era segur la promozion ma fèr n bon campionat coche a la fin l’é stat e, soraldut, crescer desche squadra. L lurier de chest an de segur à didà a meter i sedimes per l’an che vegn. Bèsta pissèr che domenia passèda l’età media de la formazion che à scomenzà la partida la era de 23 egn. Donca n davegnir arsegurà, semper con Mister Bernardin che à confermà sia volontà de jir inant, dessema a sie colaboradores, ence per l’an 16/17. De aost, al pontèr demez de la neva sajon, a dèr na man sarà ence Dimitri Zanoner de outa da l’Australia, Pietro Kola dò a renvegnir dal malan al jeneie e fosc ence Bruno Amplatz che à fenì de studièr.
L fin de setemèna passà se serà sù ence i ultimes campionac de la squadra mendres co la venta di Arleves per 4a1 e la desfata de la Juniores per 9a1.
Ades la sajon de balon del Fascia, lascia l post a l’Europeada, l campionat european de balon de la mendranzes, che vegnarà jièda dai 18 ai 26 de jugn, vin Badia e te la Pustertal, olache anter i 20 jiadores chiamé ite te squadra ladina, l’é ence sie fascegn: Bernard Manuel, Cigolla Patrizio, Cincelli Nicolò, Debertol Cristoforo, Deflorian Giovanni e Porcu Davide.
Chesta edizion de l’Europeada veit ence l tornoi feminin, olache te la formazion ladina l’é stat chiamà ite Depaul Elisa, Rizzi Nadia e Zulian Valentina