Fascia – La Rovere 2 – 1 (gol de Matteo Piccoli e Davide Porcu)
Formazion del Fascia: Cincelli, Gaspari, Trottner, Petrone, Drlje, Debertol (25’s.t. Dellafior), Porcu, Piccoli, Toma, Cigolla (20’ s.t Pezzei), Deflorian Giu.
Se podessa dir che vèlch outa na partida de balon l’é na metàfora de vita: a la fin i conc vegn fora giusć.
E la endesfida de domenia passèda contra La Rovere metuda apede a la parità de la domenia dant contra l Mattarello, à fat pissèr a chest. Da una, na partida olache seence l Fascia meritèa de venjer, i trei ponc i era desvanì a l’ultim menut, da l’autra trei ponc fosc manco vadagné, rué de gra a na trata dai undesc metres conzeduda mingol a la lijiera dal diretor de jech, giusta dant del scìgol de la fin.
Chela contro la formazion de Roveré della Luna l’é stat na classica partida de fin sajon, zenza gran gaissa e che no semper palesea l reèl livel de la doi squadres. Ampò, enceben che l Fascia no abie jià na gran partida, no à mai padì l jech di ghesć che à abù l soul merit de proèr enscin a la fin a se portèr a cèsa n pont che, seben che per la clasifica no ge servia a nia ajache i é jà jic endò te seconda categoria, dajea onor a la serietà de la sozietà.
L Fascia de contra ge tegnia a serèr sù l campionat zenza mai perder sul ciamp amich de Vich e coscì l scomenz l’é stat dut ladin con dotrei ocajions blochèdes più dal diretor de jech, che vedea forajeghes dut intorn, che dai aversaries. L vantac fascian l’é ruà dò zirca vint menuc de gra a na bela jièda de Beppe Deflorian che à dat n balon de or a Piccoli che à podù trèr zenza dificoltà l balon te usc.
L vantac ladin no à mudà nia te l’andament de la partida col Fascia semper mingol sot ritm ma col control de la endesfida, enscin a la mesora del secondo temp canche na sortida dei trentins e vèlch disatenzion à fat scì che i ghesć troasse l pont de la parità. Toché te l’orgolie i joegn de cèsa à proà a uzèr l ritm de jech ma sessaben che canche se va pian duta la partida, no semper l’é sorì jir de bel a la fin e coscì somèa che ence enstouta l resultat finèl no podea esser auter che la parità. Ampò, fora da n bel seren, desche dit, l’é ruà la trata dai unesc metres che Porcu é stat bravo a realisèr.
Doi a un donca e na venta che porta a passèr via l Gardolo, arjonjan coscì l quarto post. Posizion chesta da mantegnir te l’ultima endesfida de la sajon, domenia ai 29 de mé, sul ciamp de Vattaro.
Chisc i resultac e la partides che vegn del la squadra mendres:
La Juniores à vent 2a1 contra l Verla de gra ai goi de Gianmarco Cemin e Samuele Secchi e la jiarà sabeda da les cinch a Vigolo Vattaro contra la Vigolana. I Arleves à vent 4a1 contra la Dolasiana (2 goi de Nik Trottner, Nicolas Toma e Daniele Brunel) e i jiarà sabeda a Vich da les sie contra l Levico. I Giovanissimi à perdù 2a0 contra l’Ortigaralefre e i jiarà domenia da mesa les unesc a Vich contra l Verla. La doi squadres di Esordienc à parejà anter eles per 3a3 e les jiarà sabeda da les cinch, la “A” a Pardac e la “B” a Vich contra l Fiem.