Formazion del Fascia: Cincelli, Bernard, Trottner, Deflorian Gio., Drlje, Porcu (30’ s.t. Pezzei), Petrone, Piccoli, Bolgiani, Deluca, Zanoner (35’ s.t. Kola).
L’é stat na setemèna dassen empegnativa chela passèda per i bec de mister Bernardin, che te set dis à jià trei partides una più senestra de l’autra. Empegnativa ma ence positiva ajache su nef ponc disponiboi i ladins i n’à portà a cèsa set.
Dò la venta tel derby de contra a la Dolomitica, en jebia ai 24, l Fascia à jià sul senester ciamp de Verla. L’é stat na partida dalbon ria te n ciamp n muie strent olache l’éra senester jièr delvers a balon. Defati, tant una che l’autra squadra à metù ensame pecia azions co la bala jabas tant che a dir de cèlch jiador somèa de più a na partida de tamburel che de balon. I ladins é stac i prumes a passèr inant tel resultat de gra a na bela trata de Piccoli. Sot de n gol i cembrans i à metù amò più gaissa e coscì a fat ence i fascegn. Ampò tel secondo temp dò n par de gran parèdes de Cincelli l’é ruà l gol de la parità de gra a l’atacant de cèsa, Rossi. L resultat podea esser ence giust aboncont Bolgiani e compagnes no i volea lascèr a Verla nience n pont e fin a la fin à proà a jir ai ciapèr duc e trei. E coscì i à fat. Proprie te l’ultim menut de recuperament, i joegn de Fascia, à metù ensema na bela azion finalisèda endodanef da Matteo Piccoli co na gran trata da fora de l’area olache l portier de cèsa nia a podù.
En domenia passèda enveze l Fascia no l’é stat bon de venjer contra l Telve e a dir l vera, per chel che se à vedù sun ciamp de Vich l resultat de parità l’é stat chel giust. Fascia e Telve se à endesfidà enscin dal prum menut con gran gaissa, bona jièdes e n bon ritm de jech. L prum temp l’é stat dut fascian con amancol cinch bona ocajions da gol falèdes dai jiadores de cèsa, con Zanoner, Piccoli e Bolgiani che, o no i é stac bogn de trefèr l busc giust o i se à fat fermèr da portier ghest e remenat. Beleche dut da l’auter vers l secondo temp. I jiadores Valsuganoc, à profità del arbassament de ritm dei fascegn, amò mingol stencé da la partida de jebia e, più che n’outa é jic apede al gol. Te n par de ocajions ge à metù na peza l portier ladin e un ‘outa l’é stat l remenat a rebater na trata che someèa. Ampò, dò na mesora duta dei ghesć, te i ultimes menuc l’é stat amò Deluca e Bolgiani a se troèr te anter i piesc l balon de la venta, purampò l’é mencià la forzes per l spenjer te usc.
Dut sumà, doi ponc perdui se se vèrda al prum temp e fosc un vadagnà se se peissa al secondo, donca podon dir che va ben coscì.
Chesta domenia, la formazion del president Ghetta, jiarà a Fornace de contra l Civezzano, da mesa les cater.
L’é stat n bon fin de setemèna ence per la squadra mendres, co la ventes de Arleves (3a1 a la Dolomitica) e Esordienc “A” (3a0 contra la Monti Pallidi) e l pareje de la Juniores (2a2 contra l Primier). I Giovanissimi à enveze perdù 3a2 contra l’Oltrefersina. Chisc ultimes i podarà se refèr col Valsugana, domenia da mesa les undesc a Vich. Duta l’autra squadres jiarà alincontra sabeda: la Juniores contra l’Oltreferina a Perjen da mesa les cinch, i Arleves contra l Primier a Vich da les sie, i Esordienc “A” contra l Civezzano a Vich da les cater, i Esordienc “B” contra l Valcembra a Segonzano da les cater.