Formazion del Fascia: Cincelli, Bernard, Trottner, Deflorian Gio., Drlje, Porcu, Pezzei (25’ s.t. Petrone), Piccoli, Bolgiani, Deluca, Deflorian Giu. (30’ s.t. Zanoner).
Doi vente su doi per l Fascia te la endesfides de la Veisc. Dò l trei a nia contra l Fiem, l’é ruà ence l trei a un contra la Dolomiti che à portà i ladins a set ponc e lascià la formazion da Pardac amò ceta a zero junfon la clasifica.
L’é stat na venta vadagnèda ma no sorida per l Fascia enceben che l scomenz dajea a pissèr a n domarena zenza cruzies. Defati, dò nience n menut Deluca à abù te anter i piesc l balon del vantanc trajan ampò na bala massa lijiera envers l’usc aversarie. No passa trop però che i ladins troa l vantac, de gra a na bela combinazion Drlje-Bolgiani con chest ultim (nef capitan ajache Debertol restarà fora per n azident muscolèr dut l’uton), che da vejin no dèsc redenzio al portier ghest. I pardacians somea dassen no esser te ciamp e per n chèrt de ora no i rua a passèr da l’autra pèrt del ciamp.
Fosc perché la partida somea massa sorida, i fascegn chèla gaissa e dinamism lascian coscì a la Dolomitica la scomenzadiva e dò pec menuc rua l gol de la parità de gra a na trata de Gabrielli che troa defendura e portier fascegn mingol fora de post.
L prum temp se sera sù zenza autra grana ocajions, aldelà de doi passajes, un per pèrt, che metea dedant usc Brigadoi e Deluca. L prum serà sù a na vida fosc ence mingol grovia da Trottner, l secondo ruà demò co la ponta del pé a tochèr l balon, ampò blocà dal portier aversarie.
I secondi carantacinch de jech no i é stac proprie sgalizenc ampò se l’éra na squadra che desmostrèa de voler venjer più de l’autra, chesta l’éra l Fascia che mai à padì la scomenzadives di atacanc pardacians, fosc zenza na gran condizion, e che più de n’outa à proà a jir en vantanc con trates de Porcu, Deflorian e Zanoner. Proprie chest ultim jiador, metù te ciamp a chinesc menuc da la fin, à mudà l’èjit de la endesfida, troan a la seconda ocajion, l gol del doi a un. Vantac giust aldò del jech metù te ciamp tel secondo temp e legitimà dal terzo gol de Matteo Piccoli, che dò aer ciapà bala da Deluca, à fat fora trei defensores e zenza prescia à trat l balon te sach.
Trei a un e duc a cèsa, o miec, a festejèr.
L calandèr pervedèa per chesta setemèna, na partida ence n jebia (Verla – Fascia). De chesta ve dajon cont la setemèna che vegn. Chesta domenia enveze, l Fascia jiarà indò sul ciamp de cèsa contra l Telve da mesa les cater.
L fin de setemèna passà l’é stat positif ence per la squadra mendres del Fascia co la Juniores che à vent 3a2 contra i Solteri (doi goi de Luca Rasom e un de Matteo Vian) e coi Arleves che à vent 3a0 contra l’Ortigaralefre (doi goi de Nicolas Toma e un de Gabriele Riz.
Doman, sabeda ai 26 de setember, la Juniores jia da les cinch a Vich contra l Primier e i Esordienc “A” e “B” scomenza l campionat contra Monti Pallidi e Dolomitica. Domenia da mesa les unesc, Arleves e Giovanissimi jia a Pardac e Madran contra Dolomitica e Oltrefersina.